Толқы, толқы, тал қайық,
Толқында шайқал, тербетіл.
Көк айдынды шарлайық,
Кезейік кербез көл бетін,
Толқын жалын қармайық.

Қайырмасы:
Жанымда толқын тулайды,
Отты махаббат тынбайды.
Қайығым, көлде көлбе,
Сейілсін зілдей мұң-қайғы.

Шалқы, шайқал, көк айдын,
Ақ бұйра жалын жазылсын.
Жағалауға қараймын,
Қыз бірақ мені нағылсын!
өтті жарсыз талай күн.
Қайырмасы.

Самға, қайық, алып ұш,
Алдымнан айдын ашылсын.
Жүрек толы сағыныш,
Алауы аздап басылсын.
Самға, қайық, алып ұш!
Қайырмасы.

Көрдің бе сен, Баянның шың-құздарын,
Кеудесінде ойнаған жұлдыздарын?
Көрдің бе сен Баянның баурайында
Жайраң қағып, жайнаған ұл-қыздарын.

Қайырмасы:
Таулары биік айбынды,
Көлдері мөлдір айдынды.
Қыздары көркем май гүлі,
Баянның ұлдары көпке әйгілі.

Асқақтатып ақ беттен Баян әнін,
Жер сұлуын келсе егер аялағың.
Жасыбайдың көлінде сайран салып,
Саяла сен жұпарлы сая бағын.
Қайырмасы.

Баянауыл басында күн аумайды,
Көл бетінде күлімдеп нұр ойнайды.
Алматыдан алыстау демесеңдер,
Алатаудан Баяным бір аумайды.
Қайырмасы.

Ормандар тыныштықты ұнатады,
Армандар таңмен бірге гүл атады.
Жасайды жарық күннің шұғыласында,
Жасайды халық туған Ұлы Отаны.

Қайырмасы:
Бейбіт күн – арманы адамның,
Бейбіт күн – оқ атар саған кім?
Бейбіт күн – жалғасы арманның,
Бейбіт күн – жолдасы жаңа әннің.

Қалалар қамсыз шамын жаға берсін,
Балалар мектебіне бара берсін.
Ініні ағалары жетелесін,
Баланың бар қызығын ана көрсін.
Қайырмасы.

Жер шарын мекендеген бүкіл халық,
Біздің ел дәстүрінен қуат алып.
Советтер Одағы боп сүйінері,
Достығын Отанымның отыр танып.

Қайырмасы:
Барлық халық, бақыт үшін тартқан алға, алға!
Біздің ту – Совет туы, берік қолда!
Партия қайда болса,
Партия қайда болса – жеңісм сонда!

Жиһанға жат болсын деп соғыс аты,
Сақтаулы қол қойылған «Әлем хаты»
Бала – жас, ана – жесір, әке – құрбан
Болсын деп жаралмаған адам заты.
Қайырмасы.

Отаным мәңгі бақыт шамын жаққан,
Қуатым құмда суды толқындатқан.
Біздің ел – еңбек елі, шөл далаға
Жайқалта жапырағын бақ орнатқан.
Қайырмасы.

Әлем сүйген салтымыз бар –
Бейбітшілік ел ұраны.
Өмір сүйген халқымыз бар –
Бейбіт елдің біз ұланы.

Қайырмасы:
Халықтар өмірді қорғайды,
Әділет ұранын қолдайды.
Шырқаңдар, кел достар, әр елде:
Бейбіт күн жасасын әлемде!

Қорғау үшін өмір көркін –
Бүгіннен де ертең нұрлы.
Болдырмаймыз соғыс өртін,
Достар берік сапқа тұрды.
Қайырмасы.

Ел ұраны мәңгі анық –
Әр жүректе жатталады.
Қолға алса барлық халық
Бейбітшілік сақталады.
Қайырмасы.

Бүкіл әлем көгін шарлап келем мен,
Менің елім күн нұрына бөленген.
«Бейбітшілік керек!» – дейді жер үсті,
Жалындаған, дауылдаған өлеңмен!

Қайырмасы:
«Бейбітшілік!» – халық ұраны,
Лаула мәңгі өмір шырағы!
Бүкіл әлемде,
Шалқар қоныста
Жол жоқ қанды соғысқа!

Ақыл-ойы адамзаттың ғажап шың,
Оты болмай, соты болсын азаптың!
Таза ауадай жер үстінде жасасын
Бақыт, теңдік, бейбітшілік, азат күн!
Қайырмасы.

Өмір керек – маған, саған, оған да,
Өмір туы біздің туған Отанда!
Адам досы – Совет халқы бастаушы
Соғысы жоқ, бақыты мол қоғамда!
Қайырмасы.

Қара түннен туады,
Қызыл шырай бұла таң.
Аппақ нұрмен жуады
Ақша бетін гүл – Отан.

Қайырмасы:
Бұла таңы бол елдің,
Құла таңы бол елдің,
Әлли, бөпем, әлди-ай!

Қара жерден туады,
Жасыл орман, баламыз.
Көк тоғаймен буады,
Белін шөлейт даламыз.

Қайырмасы:
Көк орманы бол елдің,
Ақ арманы бол елдің,
Әлди, бөпем, әлди-ай!

Қара бұлттан туады
Жасыл оты жауында.
Жасыл болып қуады,
Жауынгер ұл жауын да.

Қайырмасы:
Нажағайы бол елдің,
Ғажап Айы бол елдің,
Әлди, бөпем, әлди-ай!

Сен жүрер деп алдыңда жолың жатыр,
Атқа мінсең, атаңдай болған батыр.

Әлди-ай, әлди-ай, әлди-ай!

Орман, тоғай жайнайды сені күтіп,
Бұлбұл әнге салады сан құбылтып.

Әлди-ай, әлди-ай, әлди-ай!

Тауға шықсаң атаға гүл ала кел,
Алдың ашық, жан бөпем, қуана бер.

Әлди-ай, әлди-ай, әлди-ай!

Әнге, күйге әрқашан толы бауың,
Мектебің де соғады қоңырауын.

Әлди-ай, әлди-ай, әлди-ай!

Сен алысқа кеткенде сағынамын,
Ұйықтап қалдың біткенше менің әнім.

Әлди-ай, әлди-ай, әлди-ай!

Сағындым, сағым уақыт,
Табатын жаным бақыт.
Балалық ұяның,
Қарлығаш қиялың
Еске алып, тербелемін.
Жұлдызын көгімнің,
Бақытын өмірдің
Аңсаумен мен келемін

Қайырмасы:
Сағыныш-ай, сағыныш-ай,
Сен де бір арман,
Сен де бір жалған.
Сағыныш-ай, сағыныш-ай!
Сенімен бірге
Толқиды жаным менің

Сағындым сағым жылдар,
Өттің-ау ағып, жылдар.
Баладай алаңсыз,
Баянды, баянсыз
Тағдырға бағынумен.
Оралып келе алмай,
Достарды көре алмай,
Күн кештім сағынумен.
Қайырмасы.

Сағындым, сағым күндер,
Сағынсам жаным гүлдер.
Өмірдің көшінен,
Мен, бәлкім, кешігем,
Сағынып кеш қалармын.
Балалық көктемім,
Қамығып өткенің
Аңсаумен еске алармын.
Қайырмасы.

Гүл шоғы таң нұрымен ашылады,
Арманым, ақ тілегім асығады.
Жанамын от боп лаулап сен дегенде,
Қалауын жүрек қалай жасырады.

Қайырмасы:
Қызғалдақты белестегі,
Терейік бір, қалқажан.
Бақыт ортақ емес пе еді,
Қыз, жігітке, әрқашан.

Көктемнің алаулаған күндерінде,
Аяулым, желек атып гүлдедің бе?
Ән болып асқақтайды сағынышым,
Жырақта жыл құсындай жүргенімде.
Қайырмасы.

Білемін жүрегіңде дастан барын,
Жарасты екі жастың ашқан бағын.
Махаббат бесігінде тербелейік,
Ашайық адал сырды, жасқанбағын.
Қайырмасы.

Құс та болғым келмейді, қанатым бар,
Қанатым бар күмістен жаратылған.
Сәби болғым келеді, сәби болғым,
Мына өмірден хабарсыз, жаңа туған.

Tap бесігі - кең жаһан, тарылмаған,
Біреуге бар, біреуге табылмаған.-
Сәби болғым келеді, сәби болғым,
Ана сүті аузынан арылмаған.

От та болғым келмейді, жылуым бар.
Жылуым бар, керек пе, жылыныңдар.
Сәби болғым келеді, сәби болғым,
Күн сәулесі ойнаған тұлымымда.

Қанаттанып өмірге ұшарымда,
Кесілмесін бәрібір тұсауым да.
Сәби болғым келеді, сәби болғым,
Сәбиі жоқ ананың құшағында.

Жұрт сүйсінер әнің бар,
Әзілің бар, назың бар,
Жадыраған жаның бар,
Жүрегіңде жалын бар.
Туған айдай қасың бар,
Сүмбіл қара шашың бар.
Құлын мүсін талдырмаш,
Кімге болар асыл жар!
Қайырмасы:
Көрерімде қалқаны,
Оң қабағым тартады.

Көлдей тұнық көзің бар,
Өлең-жырдай сөзің бар,
Гүлдеп тұрған кезің бар,
Өзің шекер, өзің бал.
Ерге бітпес еркің бар,
Жанға бітпес көркің бар.
Сен дегенде дертім бар,
Сенің кімге сертің бар?
Қайырмасы:
Дауысыңа ел құмар,
Сәулем саған мен құмар.

Армандай асыл ақ дәурен,
Алыстап қалды-ау Қаракөз.
Алаулап атқан таңдармен
Келмейді-ау сол бір бала кез.

Тырналар ұшып өткенде,
Түседі-ау еске бала кез.
Қызғалдақ көрсем көктемде,
Түседі-ау еске Қаракөз.

Аққу кеп қонса көліне,
Түседі-ау еске Қаракөз.
Тырналар қайтса еліне,
Түседі-ау еске бала кез.

Сағынған жақсы бір сәтті
Сағыныш екен бала кез.
Есіме алсам бір шақты
Арманым екен Қаракөз.

Армандай асыл ақ дәурен,
Алыстап қалды-ау Қаракөз.
Алаулап атқан таңдармен
Келмейді-ау сол бір бала кез.

Есігімді ашып, еріп кіргелі,
Сен болып бақыт келіп тұр ма еді.
Қарақат көзім, әніңмен алғаш,
Еріттің мені, еліттің мені.

Қайырмасы:
Құшағымды ашып,
Көңілім тасып,
Бірге жүрген күндерімді сағындым.
Бақытым менің,
Жақұтым менің,
Кел, кел, кел.
Ғашығым менің,
Асылым менің,
Сен, сен, сен.

Көзімде неге, көл, дірілдедің?
Солмаса екен енді гүлдерім.
Қуантсаң – қуант, мұңайта көрме,
Моншақтай мойыл мөлдірім менің.
Қайырмасы.

Жұлдызым жанып, жайнасын бағым,
Бұлбұлым қонып, сайрасын бағым.
Хабарың келмей қамығып жүрмін,
Сағынып жүрмін, қайдасың, жаным?
Қайырмасы.

Жайма  шуақ көктемнің жасыл күні,
Балбұлақтан естисің мың күлкіні.
Аспан асты бір саған құмартқандай,
Тамылжиды аулақта бұлбұл үні.

Қайырмасы:
Аялап тербеткен,
Сұрашы жер-көктен!
Әлемнің сенде қызығы,
Күннің де сенде қызуы,
Бір өзің аңсарым,
Бір өзің жан жарым!

Сабыр етші, жан сәуле, тыңда тағы,
Сен дегенде тау шыңы тіл қатады.
Ақ қайыңмен сырласып ұзап шықсаң,
Әншіл арман бір сен деп шырқатады.
Қайырмасы.

Кезсем-дағы қай өлке, қай даланы,
Самал желі сені аңсап аймалады.
Махаббаттың көрдің бе құдыретін,
Жердің өзі бір сен деп айналады.
Қайырмасы.

Күннің нұры шың басына өрмелеп,
Қоштасқанда бұлттарменен көктегі.
Келші құрбым, кешкі қоңыр самал боп,
Дөң басына, жас еменге шеттегі.

Ақ ниетпен сонда ұзақ сырласып,
Келер таңды бірге қарсы алайық.
Келсектағы екі жақтан екеуміз,
Қол ұстасып ауылға бір барайық.

Осы бір кеш біздер үшін болмасын,
Көп кештердей белгісі жоқ өткен бір.
Екеуміздің сезіміміз қашанда
Таңғы шықтай болсын құрбым мөп-мөлдір.

Соқ, барабан! Көк танктер қаптасын,
Қызыл ерлер жауды жеңіп таптасын.
Соқ, барабан! Күрсілдесін зеңбірек,
Жаудыр оқты, броневиктер дөңгелек.

Таста, таста көктен бомба, сұңқарлар,
Ит фашистер кірерге көр таппасын.
Қират, қират қызыл ерлер фашисті,
Ұлы Отанға сендердей күшті ер керек.

Соқ, барабан! Қаһарлансын қызыл ер,
Зәресі ұшып үрейленсін Гитлер.
Ұйпап-жұйпап қызыл ерлер фашисті,
Алақайлап шын қуансын ел мен жер!

Соқ, барабан! Фашист сасып шегінсін,
Шегінсін де, тас-талқан боп жеңілсін.
Талай елді зар жылатқан жалмауыз,
Қанқұмар ит Гитлер көрге көмілсін.

Шөпілдеп қара көзден мөлдір жасың,
Төгіліп белуардан қолаң шашың.
Күт мені терең сақтап жүрек сырын,
Серттесіп қол алысқан жан жолдасым.

Қайырмасы:
Ахау, сүйген сәулем,
Ахау, сүйген сәулем,
Қажыма, алдымызда қызық дәурен.

Мен жүрмін алыс жерде солдат болып,
Халқымның бейбіт жатқан жерін қорып.
Гүлденіп, нұрлана түс, мен келгенше,
Көп ойлап, бәйшешегім, қалма солып.
Қайырмасы.

Он жыл бұрын нұрға толы жанымыз,
Арман қуып кеткен едік бәріміз.
Он күндей боп он жыл өтті, кездестік,
Бас қосуға арналады әніміз.

Қайырмасы:
Достар, достар кетсек те біз есейіп,
Бар қызығын өмірдің бір кешейік.
Он жыл өтсін, жыл жиырма, жүз жыл өтсін,
Амандықпен әрқашан кездесейік.
Кездесейікғ жүздесейік

Меруерт толы, маржан толы көңілден,
Бал бақыттың әсем әні төгілген.
Дүниеге кірпіш болып қаланып
Орнымызды таптық бүгін өмірден.
Қайырмасы.

Бір ұядан түлеп ұшқан құстарымыз,
Жақсылық пен адалдыққа құштармыз.
Еңбекпенен тіршілікке сән беріп,
Достық туын әркез биік ұстармыз.
Қайырмасы.

Ардағым ба едің,
Арманым ба едің,
Кезікпей келген бейне ме ең.
Арайлы әсем,
Таңдарым менің,
Кеш көрдім бе екем дей берем.

Ән болып келдің,
Сән-көрік бердің,
Қарадым үнсіз ұрланып.
Өзіңді қалқам,
Таң болып көрдім
Кеткендей кеудем нұрланып.

Мөп-мөлдір көзің,
Төккен нұр сезім,
Лаулатты бойда жалынды.
Қалар ем үнсіз,
Жетпейді-ау төзім,
Өрт шалды, қалқам, жанымды.

Үн қатпай саған,
Тыңдатпай тағы ән,
Қиялға батам кейде мен.
Жанымды қалай,
Жырлатпай қалам,
Кешіктім бе әлде дей берем.