Кел біздің Ойыл, Қиыл саламызға,
Жан сая самал өскен даламызға.
Байлаулы балдай тәтті бағланымыз,
Сар қымыз сапырулы сабамызда.

Қайырмасы:
Қыры қырман қайнаған,
Ойы думан шалқыған.
Атамекен туған жер,
Айналайын Ойыл деген,
Ойыл деген даңқыңнан!

Сыңсыса су бойында бақтарымыз,
Сай күміс өсті қырда ақ тарымыз.
Ай жатып аулымызды араласаң,
Белдеуде дәйім дайын аттарымыз.
Қайырмасы.

Жез таңдай желдей ескен жыршымыз бар,
Ойнаған он саусағы күйшіміз бар.
Қыздырған қыруар жігіт делебесін
Қынай бел, қаз омырау бишіміз бар.
Қайырмасы.

Елім бай жаны жомарт жастарыма,
Жерім бай жеңістердің дастанына.
Ардақтап ата Шоқан аруағын,
Тартамыз талай табыс асқарына.
Қайырмасы.

Сағынғанда жарыңа
Жіберіпсің орамал.
Жабырқасам, жаныма –
Жәрдем берген сол – аужал.
«Сәулеме» деп жазылған
Орамалда сөзің тұр.
Сонда сенің сағынған
Мөлдіреген көзің тұр.

Жалғыз ауыз сөзіңді
Дәрмен көріп жаттаймын.
Қайда жүрсем өзіңді
Көкіректе сақтаймын.
Сақтай-сақтай жүремін
Төс қалтамнан шығармай.
Жүрегің мен жүрегім
Бірге соғып тұрғандай.

Отаным, кең далам, орманды,
Болаттан соғылған қорғанды.
Бақыттың, шаттықтың мекені,
Қолдаймын, қорғаймын Отанды.

Қайырмасы:
Туған жер – алтын таң,
Кең далам, таулы орман.
Ұл мен қыз қорғаймыз,
Бақытты ұлы Отан.

Айдын көл, дархан ел, туған жер,
Жастарың жалынды жауынгер!
Жарқын жаз, үйрек, қаз жүзетін,
Күміс су, кең байтақ жасыл бел.
Қайырмасы.

Сәнді тау, бақша-бау, шалқар көл,
Малға жай, кенге бай туған ел.
Тәтті күй, әсем би, сұлу ән,
Ойнайды ер, шырқайды ел, шаттық жел.
Қайырмасы.

Баулыған партия күніміз,
Отанның жан қияр ұлымыз.
Аттан сап қойсақ лап уралап,
Көкке өрлер дауылпаз үніміз.
Қайырмасы.

Жұлдыз жусап аспанда,
Күзетте «Жеті қарақшы».
Қорған болып Отанға,
Шекарада тұр сақшы.

Борышыңды атқарып,
Сен қайтарсың күлімдеп.
Ән шырқатып, шаттанып,
Қарсы алармын «күнім» - деп.

Күзет достым, сақ бол, сақ,
Бетіңнен сүйсін алтын таң.
Тынығып... тыныш ұйықтап,
Күле оянсын ұлы Отан!

Туған өлке құлпырып
Жасыл орман жамылды.
Жаңа толқын бұлқынып,
Жағалай шам жағылды.
Даңқы кеткен жер-көкке
Ұлан байтақ еліміз.
Озып шығып еңбекте,
Жұлдыз таққан еріміз.

Қайырмасы:
Әкеміз, қамқоршымыз – ұлы Ленин,
Өмір күні – Ленин!
Халқымыз болашаққа бара жатыр,
Жол нұсқап тұр партия!
Әкеміз, қамқоршымыз – ұлы Ленин,
Өмір күні – Ленин!
Халқымыз болашаққа бара жатыр,
Жол нұсқап тұр партия!
Жол нұсқап тұр,
Жол нұсқап тұр партия!
Болашаққа бара жатыр
Жол нұсқап тұр партия!
Қамқоршымыз – ұлы Ленин,
Өмір күні – Ленин!
Болашаққа бара жатыр
Жол нұсқап тұр партия!

Ақ үйден бір қыз шықты көзі күлген,
Үстінде дүрия көйлек шәймен бүрген.
Сол қыздың сұлулығын мен айтайын,
Шаштарын он күн тарап, бес күн өрген.

Қайырмасы:
Ой, көк, апырым-ай,
Жастық дәурен өте ме-ай?!

Сол қызды бір көргеннен болдым ғашық,
Сөйлесіп көрісуге көңіл ашық.
Сүймейді сұлу қызды қандай адам,
Тұрғанда туған айдай нұрын шашып!
Қайырмасы.